O Concello de Noia fixo balance das contribucións municipais destinadas ao ámbito local da docencia, unhas achegas por valor de 150.000 euros que tiveron o nexo común de contribuír á mellora da actividade educativa e da conciliación laboral-docente das familias dende frontes diferentes pero complementarias. Así, fortalecéronse ámbitos de actividade como o servizo de madrugadores, as axudas para o servizo de comedor, as axudas para a adquisición de material escolar (30 euros por alumno) e as actividades extraescolares.
Segundo fixeron saber en rolda de prensa o alcalde Santiago Freire e máis o concelleiro de Educación, Iván Lorenzo, foron máis de 400 as persoas beneficiarias das axudas, que, segundo indicaron, “supuxeron un importante respiro para as familias”. E engadiron: “Estes datos supoñen que o Concello de Noia é o municipio de toda a contorna que máis inviste en educación”.
As axudas do comedor beneficiaron a máis do 90% dos solicitantes. No caso do material escolar, cubriuse o 100% das peticións. No que atinxe ao comedor, superouse o 90%.
O investimento realizado nos últimos anos na mellora e o mantemento dos colexios locais e institutos, ao que se engade a implantación de novos servizos, superou os 4 millóns de euros, salientaron.
