O Concello de Rianxo iniciou os días pasados a instalación dos tres composteiros comunitarios que nas próximas semanas estarán habilitados no noso municipio. Trátase de áreas urbanas que contan co equipamento preciso para favorecer un aproveitamento rendíbel e sustentábel do lixo orgánico xerado nos fogares.
O Concello tamén explicou que en datas vindeiras comezará o reparto dos caldeiros para a veciñanza que participe na compostaxe comunitaria, así como unha campaña de información respecto ao proceso de compostaxe.
A actuación enmárcase na estratexia sustentábel a seguir nos próximos meses polo Concello de Rianxo, destinada a “dar cumprimento á normativa vixente en relación á recollida separada da quinta fracción (materia orgánica) para o cal instalaranse colectores marróns en diferentes puntos do municipio, favorecer unha xestión do lixo máis eficiente e sustentábel”.
