O Concello de Ribeira participa cun stand de turismo propio na VII edición de Expocidades, que se celebra en Valongo (distrito de Porto, Portugal) do 6 ó 10 de setembro.
A Mostra Turística das Cidades do Eixo Atlántico é un evento que reúne a diversas cidades situadas na costa atlántica de España e Portugal co obxectivo de “promover o turismo e poñer en valor as características culturais, naturais e gastronómicas que ofrecen os distintos destinos participantes”.
Segundo fai saber o Concello de Ribeira, trátase “dun evento de gran importancia que xoga un papel fundamental na promoción do turismo sustentábel e a cooperación transfronteiriza entre as cidades participantes”.
“Esta feira ten como propósito a promoción do turismo de proximidade pero tamén é unha oportunidade para fortalecer os vínculos culturais e económicos entre as rexións e para afrontar retos comúns, como a xestión sustentábel dos recursos naturais e a promoción dun turismo responsábel”, explica o concelleiro de Turismo, Festexos, Relacións Institucionais e Novas Tecnoloxías Francisco Suárez-Puerta Colomer.
