O clima sempre é un tema de conversa que nunca falla e da resultado: nas xuntanzas familiares ou de amigos, nos momentos libres no traballo… o que falamos vai ultimamente do calor abafante -en Galicia tamén, é ben sabido- á choiva inclemente con sesións de treboada (como a rexistrada onte pola tarde e pola noite en boa parte da comunidade autónoma).
O problema verdadeiro chega cando os fenómenos climáticos tornan tan estraños e perigosos que impiden que se poida falar de calquera outra cousa.
Estes días a DINA (Depresión Illada en Niveis Altos) ven de se converter na protagonista absoluta de contidos nos medios de comunicación e conversas en toda España debido á terrible espiral de destrución que deixou e aínda deixa ao seu paso.
Os danos provocados pola DINA (ou DANA) foron enormes en moitos lugares de España e Europa -especialmente en Grecia- e mesmo tráxicos pola perda de vidas humanas. Algo que, unha outra vez, pon de manifesto que estamos a vivir nunha emerxencia climática na que pasamos da calor estrema a destrutivos anegamentos en cuestións de tan só unhas horas.
Segundo afirma a asociación ecoloxista WWF, que as DINAS sexan cada vez máis frecuentes e estremas non é unha casualidade, xa que o quecemento do Mediterráneo “facilita as condicións perfectas para a formación de choivas torrenciais”.
Polo tanto, a medida que a temperatura aumente, podemos ter seguro que as tormentas serán piores e os seus efectos máis devastadores para a natureza e os seres humanos.
O cambio climático é, malia os negacionistas, responsable de catástrofes cada día máis destrutivas. Por isto, gobernos, empresas e sector financeiro deben asumir a súa responsabilidade -apuntan os ecoloxistas- e tomar decisións e compromisos contundentes para facer o cambio climático antes de que sexa demasiado tarde e non haxa posibilidades de volta atrás.
Organizacións como a citada WWF aseguran traballar a grande escala con gobernos e empresas para mudar a forma de produción, usar e reaproveitar enerxía, os grandes causantes da emerxencia climática. É o motivo polo que os ecoloxistas esixen “unha aposta urxente por novos modelos alonxados dos combustibles fósiles para frear esta espiral de impactos ambientais catastróficos”.
As previsións meteorolóxicas para este sábado en Galicia non son, neste senso, moi optimistas. Teñamos coidado, polo tanto.
