A segunda semana de setembro deu comezo un novo curso na Escola Infantil Municipal de Outes. Fíxoo, con 28 nenas e nenos matriculados e, segundo confirmou o alcalde Manuel González na súa visita ás instalacións, coincidindo coa reapertura das clases, a previsión é abrir unha nova aula proximamente e poder chegar aos 40 escolares.
Como lembraremos a escola é unha das novas infraestruturas educativas coas que conta a nosa comarca neste inicio de do curso 2023-2024.
Situada nas instalacións do antigo colexio vello do Cruceiro de Roo, este novo centro representa en palabras do Concello “un paso adiante para a mellora da conciliación no noso municipio”. Así se expresou o alcalde, Manuel González, na apertura formal do inmóbel, en inverno do ano pasado.
O centro foi posíbel grazas ao traballo conxunto do Goberno local, a Deputación da Coruña e o Executivo autonómico, que achegou unha axuda de 62.000 euros para a materialización do proxecto na sede do antigo CEIP Emilio de Navasqües (Cruceiro de Roo). Esta actuación supuxo ampliar en 10 prazas o actual Punto de Atención á Infancia (PAI) de Outes que se converteu así nunha escola infantil.
A rehabilitación do edificio significou un investimento de máis de 400 mil euros, con fondos procedentes da Xunta, a Deputación da Coruña e do propio Concello.
