A Federación Galega de Comercio e a Asociación de Empresarios de Ribeira celebraron o sábado pasado, 23 de setembro, o sorteo dos agasallos da campaña Mercar no teu comercio ten premio, impulsada polas dúas ditas entidades. Foi ao mediodía na praza do Concello. Asistiron o vicepresidente da Federación de Comercio da Coruña, José Antonio Seijas, o presidente da patronal ribeirense, Francisco Martínez Gude, o tenente alcalde de Ribeira, Vicente Mariño, e a concelleira de Promoción Económica, Emprego e Consumo do Concello de Ribeira, Genoveva Betanzos.
Logo do troco de tíckets por boletos (tíckets das compras realizadas durante as datas de duración da campaña, do 16 ao 23 de setembro) comezou o sorteo en directo de 1.000 euros repartidos en tarxetas prepago de 300 e de 50 euros (que serán entregadas polos gañadores en novas compras no comercio de proximidade local).
Mercar no teu comercio ten premio é unha iniciativa de promoción do comercio de proximidade galego, organizada pola Federación de Comercio da Coruña, a Federación Galega de Comercio e a Consellería de Economía, Industria e Innovación – Dirección Xeral de Comercio e Consumo da Xunta de Galicia, coa colaboración neste caso da Asociación Empresarios Ribeira.
Así, todos os clientes de Ribeira que realizasen compras no comercio de proximidade entre o 16 e o 23 de setembro puideron participar no sorteo en directo destes 1.000 euros en premios.
A patronal de Ribeira agradeceu a asistencia a todos os clientes que participaron no sorteo e felicitou ás persoas agraciadas (sorteáronse 2 premios de 300€ e 8 de 50€).
