Este mércores 27 de setembro o Centro de Recursos da Asociación Ambar das Persoas con Diversidade Funcional (Frións, Ribeira) recibiu a visita de Xabier Vidal, concelleiro delegado de Infraestruturas e Obras, Deportes, Transparencia e Participación Veciñal. Recibírono Marina, Raquel, Javi, Héctor, María, Manu, Domi e Paula, integrantes do Equipo de Running de Ambar, quen estaban a piques de saír a facer a súa rutina de adestramento con Abraham Benítez, voluntario da asociación.
Na súa visita o concelleiro puido coñecer as instalacións do Centro de Recursos acompañado por Milagros Rey, presidenta da Asociación Ambar e Joserra Figueira, responsábel da área de deporte. Máis polo miúdo, mostráronlle os diversos obradoiros e servizos que se levan a cabo dende a entidade, como por exemplo o obradoiro de cestería, arte, artesanía, o servizo de emprego ou o de fisioterapia.
Durante esta xornada, Xabier puido observar de primeira man os proxectos da entidade inclusiva e as súas principais necesidades e demandas. Tanto profesionais do equipo como persoas usuarias do centro amosaron o seu agradecemento pola súa visita.
