As farmacias das parroquias ribeirenses de Aguiño, Carreira, Castiñeiras, Corrubedo e Palmeira asinaron un comunicado compartido no que achegan a súa visión particular acerca do cambio nas quendas de garda dos dispensarios do concello de Ribeira, un cambio que se formaliza este venres 29 de setembro e que supón unha importante reorganización das quendas de garda nocturnas das boticas (en horario de 22 a 9:30 horas).
No comunicado os dispensarios das ditas parroquias expresan o seu rexeitamento ás ditas novidades.
Segundo lembran as farmacias das parroquias sobre a orixe desta disposición, “por iniciativa dunha farmacia da cidade, o Colexio de Farmacéuticos de A Coruña acordou que as gardas nocturnas, que viñan sendo realizadas polas cinco boticas de Ribeira, pasarán a ser realizadas tamén polas situadas nas parroquias de Aguiño, Carreira, Castiñeiras, Oleiros e Palmeira”. A decisión colexial, recordan, “contou co apoio de catro farmacias da capital do concello, e o rexeitamento das outras sete do concello”.
E comentan: “Aínda sendo conscientes de que a nosa opinión contraria a este cambio pode ser interpretada dende o desexo de non participar no esforzo necesario para prestar un servizo de gardas á poboación de claro interese público, as farmacias das parroquias citadas queremos facer partícipes ás veciñas e veciños do concello da nosa preocupación polo que consideramos que vai supoñer un deterioro deste servizo de interese público”.
Na súa opinión, “coa nova organización das gardas durante a metade dos días do ano unha usuaria que acuda ao Punto de Atención Continuada de Ribeira, e lle sexa receitado un medicamento entre as 22 e as 9:30 horas, terá que desprazarse ata a farmacia de garda de Palmeira, Oleiros, Castiñeiras, Carreira ou Aguiño, feito que consideramos que dificultará e mesmo encarecerá o acceso dos usuarios aos medicamentos prescritos polo servizo de urxencias, incrementando a probabilidade de que a toma do medicamento sexa adiada ata a hora de apertura dunha farmacia máis accesíbel”.
No comunicado sosteñen que “ao noso entender neste caso o Colexio de Farmacéuticos, con competencia delegada da Consellería, outorgou maior importancia ao reparto equitativo do esforzo das farmacias na cobertura do servizo de urxencias nocturno que á calidade, accesibilidade e equidade deste servizo para todas as veciñas e veciños do concello. Lamentablemente, pensamos que as persoas que precisen do servizo farmacéutico nocturno vannos dar a razón”.
