Mudan do Atlántico ao Cantábrico. E praias de Ferrol, Malpica, Carballo, O Grove ou Vigo, entre outras de Galicia son “destinos turísticos” para elas, as carabelas portuguesas, que chegan a bó número de praias destes municipios, nas que xa “picaron” a varias persoas, motivo polo que desde os concellos está a pedirse que se estremen as precaucións drante estes días.
Algúns areais marcan territorio advertindo con bandeiras amarelas aos bañistas para que, aínda que este animal mariño chegase morto, a atención manteña ao bañista nunha distancia de seguridade con ela e se dea aviso ás autoridades da súa presenza.
Os biólogos apuntan que a causa principal desta incómoda presenza da carabela portuguesa pode ser a suba da temperatura do mar.
Pablo Covelo, biólogo da Coordinadora para o Estudo dos Mamíferos Mariños (CEMMA) explica no boletín informativo Gciencia que, canto ás carabelas, “é normal atopalas na beira do mar con só o frotador. Pero están aparecendo vivas e están a piovar. É algo perigoso porque pode causarlle a morte a un cativo”.
En 2021 varias praias de Galicia tiveron que ser clausuradas pola aparición destes organismos coloniais con apariencia de medusa (augamar) pero “debíase aos temporais anteriores, o mar os arrastraban e estaban mortos”.
O que está a ocorrer agora é algo inédito. En Euskadi están aparecendo centos delas: máis de 200 desde mediados de xuño.
O biólogo do CEMMA afirma que o único que pode explicar que nestes momentos haxa tantos son as augas cálidas, se ben apunta a outros factores que poderían estar a influir: a contaminación orgánica e a redución do número dos seus depredadores.
De momento a presenza de carabelas en Galicia non é preocupante. Cada concello afectado pola chegada destes organismos deberá valorar a situación e tomar as medidas oportunas, como poñer bandeiras e carteis informativos, sinalar os areais e mesmo pechar as praias.
A carabela é un organismo colonial cuxos indivíduos se especializan para manter viva a colonia. É unha agrupación de hidroides que se dividen o traballo: o neumatóforo (parte que frota), os gastrozoides (dixestión), dactilozoides (encargados da defensa da colonia e da captura de presas) e os que se ocupan da reprodución. Do seu corpo colgan numerosos tentáculos cos que atrapan presas. Están provistas de cápsulas urticantes que poden paralizar aun peixe grande e afectar a un ser humano.
O síntoma máis común é o proído (picor). Non se debe tocar a zona afectada porque as carabelas, ao picar, deixan unhas agullas e cando as rascas, disparan. Non se pode empregar auga doce e debe acudirse de inmediato aos socorristas ou emerxencias para estraer estas agullas con pinzas. Sempre con auga de mar. Os efectos desaparecerán nunhas poucas horas . É importante non tocar as carabelas despois de que as retiren, porque o seu veleno permanece activo.
