A Regata GADIS, con novo formato despois de 16 anos dedicada a Clase Cruceiro, celebrarase esta fin de semana “en dúas xornadas moi mariñeiras”, a primeira con refachos de vento leve e variábel e algo de mar de fondo tralo paso da borrasca esta pasada madrugada pola costa galega, e a do domingo con mellor bonanza meteorolóxica, tanto de vento como de sol. Así o confirmou a organización do evento, o Club Náutico Deportivo de Ribeira baixo o patrocinio de GADIS. Ambas as institucións confirman unha vez máis con este acontecemento deportivo a súa aposta pola vela infantil e xuvenil, coa presenza garantida de preto de un centenar de embarcacións das clases Optimist e ILCA 4, sendo maioría de rexistrados os recentemente chegados á Escola de Vela Ramiro Carregal Rey, que son case 40.
A praia de Coroso será o epicentro da Regata GADIS, ao abrigo da propia enseada ribeirá, e á vista do edificio social do Náutico, polo que a evolución das probas, poderanse ver desde a súa balconada ou desde o propio dique do seu porto deportivo, nos clásicos bastóns con trazados longos de través.
O top de saída está programado ás 14.30 horas do sábado, sendo a previsión do comité o tentar validar tres probas. Ao seu regreso a terra os novos regatistas atoparanse cunha merenda mariñeira, elaborada con produtos de GADIS nas instalacións do Club.
O domingo o tiro de saída para a cuarta manga darase a 10.30 h da mañá, con outras tres probas por diante, para completar o programa deportivo que é de 6 na súa totalidade.
A entrega de premios celebrarase á 18.00 h., presidida por José Luis Torres Colomer, acompañado de boa parte da súa xunta directiva e de responsables de GADISA, entre outras autoridades.
Fotos Juan Caballero
