Boiro é este días un fervedoiro cultural de actuacións para rematar agosto en formato intenso. Este venres 25 de agosto, sen ir máis lonxe, está prevista unha completa listaxe de espectáculos e actividades abeiradas á despedida do verán que organizaron a patronal (a ABE) e máis o Concello. Por exemplo o espectáculo itinerantes de zancos e monicreques Animacreques de Catropés, ás 20.30 horas na rúa peonil.
Animacreques é unha proposta de animación e intervención na rúa que xorde a partir da técnica circense dos zancos e o virtuosismo da danza. Anxela Blanco e Vanessa Rivas (Catropés) achegan con este espectáculo un xogo visual que permitirá ao público participar e gozar desta peculiar relación entre monicreque e titiriteira.
O espectáculo de Catropés abéirase ao programa de actividades elaborado pola ABE e o Concello de Boiro para despedir o verán, unha celebración que, segundo indicaron as actividades organizadoras, “compaxinará a liquidación dos stocks dos comercios cun amplo cartel de actividades de todo tipo durante o venres 25 e o sábado 26 de agosto”.
Stocks fóra Boiro
Os comercios asociados a patronal Boirense ofrecerán centos de produtos a prezos de liquidación durante toda a fin de semana, tanto os comercios como os produtos estarán sinalizados con carteis circulares e globos coas cores amarela e azul da campaña para que os clientes os poidan localizar facilmente.
Ademais os comercios repartirán gratuitamente aos seus clientes 2.000 bolsas de algodón e a ABE sorteará a través da súa aplicación de rexistro de tíckets 5 premios consistentes en 1 carro da compra e 50€ en bonos ABE.
Festa infantil
Na praza de Galicia estarán instaladas unha serie de atraccións infantís as que se pode acceder con convites que entregarán os comercios participantes.
O venres en horario de mañá e tarde habilitaranse dous inchábeis e un toro mecánico e o sábado en horario de tarde dous inchábeis e unha festa da escuma (con entrada libre).
Animación de rúas
O Concello de Boiro programará para a ocasión dous espectáculos infantís para venres tarde e sábado pola mañá.
O Venres 25 de agosto a partir das 20:30 está previsto o espectáculo itinerante de rúa Animacreques a cargo da compañía Catropés (animación de zancos, danza, teatro… e moita improvisación). En Animacreques, a partir da técnica circense dos zancos e o virtuosismo da danza, Anxela Blanco e Vanessa Rivas (Catropés) propoñen un xogo visual que permitirá ao público participar e gozar desta peculiar relación entre monicreque e titiriteira.
O sábado as 11:30 hs na praza de Galicia estará a compañía Pillaband co espectáculo A árbore dos desexos que foi gañadora do premio Martin Codax ao mellor espectáculo infantil. Pillaband é un proxecto de Inés Gontad (de Vacas) e Ramón Feáns e que conta a historia de Raiola, unha elefanta nova que vive na sabana africana e que un día, recordando os comentarios do seu pai acerca dunha árbore milagreira que existe no máis profundo da selva, e que ten capacidade de conceder un desexo a quen chegue ata ela, decide marchar para coñecer o seu sitio no mundo, e coñecerse a si mesma.
Música, gastronomía e enoloxía
Para completar a festa a ABE e o Concello de Boiro organizan conxuntamente o sábado 26 no parque da cachada un amplo abano de actividades ás que se suma ás 13:00 o concerto de Leilia incluído no ciclo Paisaxes Sonoras da Mancomunidade Barbanza Arousa (entradas en boiro.gal).
As 14:00 hs será a quenda da actuación musical de BlackStereo (de balde) e unha degustación gastronómica a cargo dos chefs Marcos Santamaria e Manuel Ozores maridada cos viños da IXP Terra de Barbanza e Iria e que inclúe degustación de Mexillón da Cooperativa de Produtores Mexilloeiros de Cabo de Cruz (ASMECRUZ) e conservas de JEALSA Rianxeira (asociados a patronal Boirense).
A degustación terá un prezo popular de 5€ e inclúe viño, mexillóns e a degustación preparada polos chefs.
Fin de festa
A celebración rematará co concerto +dMANÁ | Banda Tributo a Maná, liderados polo carismático cantante italiano Luca Lavelli, contan cunha importante e recoñecida traxectoria musical. A súa paixón pola música traspasou fronteiras e os mesmísimos Maná eloxiaron a súa enerxía, será as 22:00 da noite e os fogos de artificio as 00:30 hs da noite, ambas actividades tamén no parque da Cachada e con entrada de balde.
Podemos consultar o programa completo nas webs www.abe.gal e www.boiro.gal.
Programación
Venres 25 de agosto
12.00 a 14.00h, praza de Galicia – festa infantil con inchábeis e toro mecánico
18.30 a 20.30h, praza de Galicia – festa infantil con inchables e toro mecánico20.30h, rúas de Boiro – animación de rúas: Animacreques, Catropés.
Sábado 26 de agosto
11.30h, praza de Galicia – espectáculo infantil: A árbore dos desexos, Pillaband
13.00h, parque da Cachada – Paisaxes Sonoras: Leilía
14.00h, parque da Cachada – actuación musical Blackstereo, degustación de mexillón e degustación gastronómica
18.00 a 21.00h, praza de Galicia – festa infantil con inchábeis e toro mecánico
19.30h, praza de Galicia – festa da espuma
22.00h, parque da Cachada – concerto tributo Maná
00.30h, parque da Cachada – espectáculo pirotécnico
