O Concello de Boiro celebrou este xoves 27 de xullo a sesión plenaria organizativa da Corporación para a lexislatura 2023-2027, que contará con catro dedicacións exclusivas e unha parcial e dous postos de confianza.
As retribucións serán de 58.079,98 euros para o alcalde; 42.976,22 euros para o primeiro tenente de alcalde; 39.695,46 euros para as outras dúas dedicacións e 19.847,73 euros para a dedicación parcial.
En canto ás indemnizacións dos concelleiros/as por asistencia a órganos colexiados mantense a proposta da anterior lexislatura e serán de 100 euros por pleno, 50 euros por comisión informativa, 50 euros por xunta de Goberno local e 600 euros por comisión de coordinación. Os plenos celébranse, con carácter xeral o terceiro xoves de cada mes; as comisións informativas o segundo venres do mes; as xuntas de Goberno terán unha periodicidade semanal e as comisións de coordinación mensual.
O pleno aprobou tamén as indemnizacións dos grupos políticos que contarán cunha retribución mensual de 100 euros por grupo e 50 euros por cada concelleiro integrante de cada grupo.
O goberno local estará estruturado en 9 áreas, que se organizarán do seguinte xeito:
Alcaldía (Relacións Institucionais, Seguridade e Emerxencias e Promoción Económica e Industria): José Ramón Romero García (PSOE).
Urbanismo e Facenda: Luís Ruiz Laíño (PSOE).
Cultura, Turismo e Persoal: María Outeiral Campos (PSOE).
Deportes e Servizos: Marcos Fajardo Outeiral (PSOE).
Medio Ambiente e Mar: Olga González Blanco (PSOE).
Política Social e Administración Xeral: Raúl Romero Treus (PSOE).
Comercio, Formación e Emprego: Roberto Lojo García (PSOE).
Ensino: Carmen Silva Rodríguez (PSOE).
Medio Rural: Francisco Bermúdez Alonso (PSOE).
