O Concello de Boiro continúa a promover os hábitos sustentábeis en materia de refugallos cunha nova edición do programa de Compostaxe Doméstica, para o que se abre un novo prazo de solicitude para 180 novos colectores. O programa desenvolvese ao abeiro das axudas a entidades locais para o financiamento de actuacións en materia de biorresiduos. Comezou a desenvolverse no ano 2019 e, dende os inicios, entregáronse xa máis de 200 composteiros en vivendas unifamiliares de todo o municipio. Ademais da entrega de colectores realizase unha formación para explicar ás persoas usuarias para un uso correcto e un seguimento durante un ano.
Fontes do Concello explican que os datos extraídos do seguimento do programa de compostaxe recollen que o emprego de composteiros supón un aforro na xestión de entre 600 e 800 litros. “A maior parte dos restos que se depositan no composteiro son materia sobrante da cociña e segaduras da horta”, engádese.
Esta nova adquisición de composteiros lévase a cabo mediante unha subvención da Consellería de Medio Ambiente, Territorio e Vivenda para o financiamento de actuación en materia de biorresiduos de competencia municipal e que están cofinanciadas pola Unión Europea-Next generation UE.
Deste xeito, calquera veciño do termo municipal que resida nunha vivenda unifamiliar do municipio ou que dispoña dunha horta con cultivo pode facer a solicitude dun composteiro no departamento de Medio Ambiente do Concello de Boiro de xeito presencial, mediante o enderezo electrónico medioambiente@boiro.org ou o teléfono 981 377 585.
