As festas de verán arrincarán o 2 de agosto e prolongaranse ata o 6, cun día a maiores, o luns 7, dedicado aos máis pequenos quenes poderán gozar das atraccións a prezos populares.
O bailarín local Fran Sieira será o encargado de dar lectura o pregón desde o balcón da casa do concello ás 22 horas do mércores . A principal novidade este ano será a recuperación do combate naval.
O concelleiro de Festexos, Francisco Suárez-Porta, destacou que a sesión pirotécnica terá lugar na zona de O Touro e explicou que o espectáculo desta edición será un avance do que se poderá ver no futuro, posto que a falta de tempo debido ao atraso que sufriu a toma de posesión do novo executivo impediu abordar unha transformación integral do espectáculo, que xa estaba contratado.
A música contará coas orquestras París de Noia, Olympus, Foliada de Ases, Compostela e Finisterre; así como un concerto a cargo do grupo Milladoiro, que terá lugar o sábado. Haberá tamén senllas discotecas móbiles o xoves e o sábado, mentres que o venres terá lugar unha nova edición do Urban Fest, un festival de música disco que situará sobre o escenario a Do Porto, Dumore, Enter, Rokiño e DT9.
Nesta edición cobrarán protagonismo os pasarrúas e tamén en concertos diúrnos como o espectáculo de danza da compañía de Fran Sieite, Neutrx.
Remitida
O acto de presentación do programa contou coa presenza do alcalde, Luís Pérez, que manifestou que aínda non existe confirmación por parte de Portos, sobre a autorización da instalación de atraccións na zona portuaria. O rexedor sinalou que se fixo un esforzo extra para enviar a documentación requirida e tamén a xustificación do grave prexuízo que ocasionaría unha negativa, polo que se mostrou optimista.
Sobre o cartel de actividades, destacou a inclusión de sesións vermú en determinados barrios da cidade, sinalando que a idea é continuar por esta liña para edicións futuras, asegurando que as festas non deben limitarse só ao centro da cidade. O presidente da comisión de festas, José Alonso, aludiu á colaboración de Amas de Casa e Alfaia na celebración da misa do Carmen.
