O alcalde de Boiro, José Ramón Romero, visitou as obras que o Concello está a acometer nun treito da AC-305 ao seu paso polo lugar de Ponte Goiáns e co obxectivo de coñecer o estado no que se atopan os traballos despregados. As actuacións están financiadas pola Deputación da Coruña mediante o Plan Único Concellos (POS+2022).
As obras que se están a realizar contemplan dúas actuacións en ambas marxes da estrada. Por unha banda realízase a continuidade da beirarrúas existente na beira sur da estrada, un tramo de 172 metros, e pola outra a restauración da beirarrúa existente no outra marxe da vía.
O Concello explica que a beirarrúa existente contaba cun estado de deterioro moi avanzado, polo que se levou a cabo a restauración dun tramo de 1,06 quilómetros que transcorre polo lugar de Ponte Goiáns.
O alcalde explicou que a solución adoptada escollida é con acabado en pavimento de formigón continuo semi-rugoso que “conta cunha maior durabilidade e que vai solucionar os actuais problemas de circulación dos viandantes”. As obras, que están financiadas mediante o POS+2022 da Deputación da Coruña, son dun importe de 106.525,87 euros.
