O Partido Popular deu a coñecer o nome da persoa que representará á comarca na nova corporación da Deputación coruñesa: será José Manuel Caamaño López, que o pasado venres tomou posesión como novo concelleiro en Mazaricos, un concello onde se estreou como cabeza de lista estas eleccións municipais en substitución de Sergio Noya Rodríguez. Como primeira suplente da lista que o PP elaborou para ter representación no goberno provincial está a ribeirense María José Sampedro, seguida da noiesa Laura Salgado e da muradá Inés Monteagudo.
Natural a paroquia de Arcos en Mazaricos, Caamaño López é doutor en Teoloxía pola Universidade Pontificia de Comillas, onde é profesor titular desde hai 16 anos. Director da Cátedra de Ciencia, Tecnoloxía e Relixión do ICAI nese mesmo organismo, onde tamén desempeñou diferentes cargos de xestión e dirección, así como realizado diferentes estancias de investigación en varios países.
Caamaño vén sumarse á de Soledad Agra Tuñas, que será a outra representante da comarca na Deputación polo BNG. Agra concorreu ás eleccións do 28M como número dous da candidatura nacionalista de Outes, e é desde finais do 2021 a responsable comarcal do Bloque en Muros-Noia.
