O Concello de Boiro deu comezo este venres 30 de xuño ás Festas do Verán 2023. Fíxoo co pregón inaugural a cargo do tecido cultural boirense. A festa continuou pola noite co concerto de Familia Caamagno, a actuación da orquestra La Principal e a Remember Fest de Peñas Boiro AC.
Ás 20.00 horas deu comezo o programa de actividades coa charanga TNT que percorreu as rúas do centro de Boiro e foi ás 22.00 horas na Praza de Galicia cando se deu comezo de maneira oficial aos festexos co pregón inaugural. A xornalista e reporteira da TVG, Noelia Rey, foi a encargada de presentar ao tecido cultural boirense que compartiu as súas experiencias e impresións de seren nomeados Raíñas das Festas.
Falou Gus Romero dos seus inicios na Escola de Música de Boiro e do que iso supuxo no seu futuro profesional como mestre de música; Sonia Lebedinsky é boirense de adopción e resaltou a importancia da cultura que fai a propia xente en Boiro; tamén Sabela King falou da importancia da educación e a cultura dende os máis novos.
Do ámbito da escrita, interviñeron Mila Torrado e Fran López Cierto que acaban de publicar xuntos un libro, e falaron tamén Marta Rios, actriz formada dende a base, dende a propia escola en Boiro; Sara Hermo, profesional do audiovisual formada na escola de cinema Olloboi e Adriana C. Tarela, adicada á produción cultural.
No acto tamén se puxo o foco na condición de “república creativa” da que fai gala Boiro e nese sentido falou a concelleira de Cultura, María Outeiral, que fixo alusión á importancia de destacar “o traballo que fai toda a xente que en Boiro se dedica á cultura, e non so de maneira profesional, senón esa xente que o seu tempo libre o dedica ás asociacións e entidades culturais como son os grupos de baile ou de música tradicional que temos no noso concello”.
Finalizou o acto o alcalde José Ramón Romero, destacando o gran potencial que ten Boiro en moitos ámbitos e tamén na cultura porque “a cultura xera emprego, xera economía, xera dinamismo social e xera sociedades mellores”. O alcalde fixo especial mención a todas esas persoa que se dedican á cultura xa que “se necesita un gran equipo humano para organizar unhas festas como as que hoxe comezan”.
Máis de 40 representantes do tecido cultural boirense recibiron a súa banda identificativa e un coche descapotábel serviu de photocall das raíñas das festas. Ás 23.00 horas comezaba a súa actuación a orquestra La Principal na praza de Galicia á vez que Familia Caamagno na Praza do Centro Social e DJ Places, DJ Xacobo, DJ Neil e Marcos Magán poñían o broche á noite do venres coa Remember Fest de Peñas Boiro AC no parque da Cachada.
