Este mércores 21 de xuño a Asociación Boirense de Empresa celebrou unha nova xornada encamiñada a mellorar a competitividade, a eficiencia, a rendibilidade e a visibilidade das empresas locais. A xornada Os 20 principios fundamentais das neurovendas, que conseguiu reunir máis dunha vintena de asistentes, convocouse co obxectivo de mostrar as máis recentes e destacadas técnicas para “conquistar a mente e vender máis”. Celebrouse salón de actos da patronal entre as 10.00 e as 14.00 horas. Foi impartida polo economista, experto en nova mercadotecnia e estratexias de venta Modesto Gómez.
O relator achegou recursos para aprender aos presentes a “falarlle á mente e non á xente”, ilustrándoos sobre o funcionamento do cerebro das persoas ante determinados comportamentos ou sobre como e onde identificar a clientes e clientes potenciais con necesidade insatisfeitas. Estes foron algúns dos 20 principios dados a coñecer de forma sinxela nesta xornada sobre neurovendas.
“As estratexias que usan as neurovendas están baseadas na reacción do cerebro dos consumidores”, tal como explicou Modesto Gómez, que engadiu que “se ben antes faciamos produtos para vender a unhas determinadas persoas, agora a clave é o contrario, temos que saber onde hai clientes con necesidades sen satisfacer e como podemos cubrir esas necesidades que teñen”. E explicou: “Hoxe temos moitos medios para saber que é o que a xente necesita e como podemos ofertarllo de maneira satisfactoria”
Máis de 20 asistentes procedentes de diferentes sectores como comercio, banca e empresas saíron con moi boas impresións desta formación na que coñeceron de maneira pormenorizada o obxectivo fundamental da neurociencia aplicada ós negocios, vender máis, mellor e chegar a máis clientes.
Esta Actuación está financiada polo FEDER e pola Secretaria de Estado Comercio no marco do programa de comercio minorista 2023.
