Este luns 12 de xuño entregáronse as distincións dos IV Premios Ramio Carregal de investigación en cardioloxía. O principal recoñecemento foi dar á cardióloga do Hospital de Santiago (CHUS) Amparo Martínez Monzonís, que centra o seu traballo recente nas alteracións que afectan ás válvulas cardíacas, consideradas como a terceira causa de doenzas do corazón. Isto plásmase no proxecto Estudo sobre os marcadores prognósticos na insuficiencia tricuspídea (IT) significativa na era do tratamento percutáneo: o papel das técnicas de imaxe cardíaca avanzada e a graxa epicárdica.
Os Premios Ramiro Carregal contan cunha dotación económica de 30.000 euros, e galardón acreditativo.
A cita, celebrada no Hostal dos Reis Católicos en Santiago, foi presidida polo empresario que dá nome aos galardóns, ribeirense de adopción, e o conselleiro de Sanidade, Julio García Comesaña.
Martínez Monzonís é cardióloga no Hospital Clínico Universitario de Santiago de Compostela e preside a Asociación de Imaxe Cardíaca da Sociedade Española de Cardioloxía. Xunto con ela, forman parte do equipo gañador Ana García Campos, Brais Díaz Fernández, Violeta González Salvado, Sonia Eiras Penas e Ramiro Trillo Nouche.
Durante o acto, o titular de Sanidade rescatou as palabras da propia galardoada para explicar que este innovador estudo “pretende comprobar a utilidade dos biomarcadores para saber en que doentes é recomendábel pasar por quirófano, e que considera clave poder determinar o papel da graxa epicárdica”.
García Comesaña agradeceu á doutora e ao conxunto de membros do seu equipo o desenvolvemento dunha investigación que se poderá trasladar á praxe diaria no Servizo Galego de Saúde e que “terá unha repercusión directa na experiencia dos pacientes”.
