A compañía teatral A Panadaría está a piques de pechar a súa xira co espectáculo Elisa e Marcela e fai unha parada en Rianxo. A función será o sábado 17 de xuño, ás 20.30 horas, na sala Arcos Moldes do Auditorio Municipal.
Trátase dun espectáculo recomendado para maiores de 12 anos.
A Área de Cultura do Concello confirmou que as entradas serán de balde ata completar a capacidade da sala. A recollida poderá facerse dende unha hora antes do evento na billeteira do auditorio, sendo máximo dúas por persoa.
A obra cóntanos a historia de dúas mulleres (Elisa e Marcela) da nosa terra que a comezos do século XX xuntan forzas para plantar cara ao mundo e deciden casar na igrexa de San Xurxo, unha delas vestida de home.
O argumento, a partir de aí, é unha crónica de persecucións, fuxidas, cambios de identidade e informacións manipuladas. O ton imprimido por A Panadaría, a diferenza do recente filme sobre os mesmos acontecementos, que se emprazaba directamente no drama, é de comedia musical: “Unha comedia musical onde o verídico parece invento”.
A dirección corre a cargo de Gena Baamonde e o texto é de A Panadaría e Gena Baamonde. A creación e a interpretación é de Areta Bolado, Noelia Catro e Ailén Kendelman.
