O escritor Manuel Esteban Domínguez (Vigo, 1971) é finalmente o gañador da novena edición do IX Certame de Novela Curta coa obra O xogo de Escher. Así se deu a coñecer na mañá deste venres 2 de xuño nun acto que estivo presidido pola primeira tenente de alcalde e concelleira de Cultura en funcións, María Sampedro, celebrado no salón de plenos do Consistorio local, e que tamén contou coa presenza na mesa de Sara Vila, da editorial Xerais e integrante do xurado, e o propio autor.
O xurado decidiu por unanimidade determinar, O xogo de Escher, como novela gañadora de entre as 22 obras presentadas, baixo o pseudónimo Andros Anderson. Así, segundo reflicte a acta na que se recolle o fallo:
“A obra destaca pola súa escrita fluída e como a trama que se presenta coma un crebacabezas implicando ao lector de tal xeito que se acaba involucrando no xogo que se propón. Trátase dun texto de calidade excepcional, ben estruturado e cun léxico moi variado e un ritmo áxil. Está extraordinariamente ben documentado, conta con distintos niveis de lectura ao tempo que abre a posibilidade de reflexionar en cuestións como a dependencia tecnolóxica e dilemas aos que nos enfrontan as novas tecnoloxías”.
María Sampedro fixo entrega a Manuel Esteban fixo entrega do cheque de 3000 € que recollía as bases do concurso ademais da publicación da obra na colección de narrativa de Xerais, o que está previsto para a primavera do 2024.
O escritor distinguido manifestou que “disfrazada baixo unha novela distópica de ciencia ficción, O xogo de Escher é en realidade outra cousa e non sei cal, se cadra é unha novela histórica ou unha reflexión sobre o problema de demarcación de límites na ciencia ou un ensaio filosófico sobre o sentido da vida ou un exercicio de metaliteratura que pretende romper a cuarta parede e interpelar o lector ou só e un libro que fala sobre un libro titulado O xogo de Escher”.
O xurado estivo formado polas seguintes persoas:
• Sara Vila Alonso, escritora, licenciada en xornalismo e xefa de comunicación da editorial Xerais de Galicia.
• Margarita Fernández Gómez, licenciada en filoloxía clásica, profesora de latín, tradutora e dinamizadora do equipo de lingua galega do IES Espiñeira de Boiro.
• Irene Montero Díaz, licenciada en xornalismo, escritora e gañadora da anterior edición coa súa novela Lúa nova.
• Xoán Fernández Callón, licenciado en historia e bibliotecario do Concello de Ribeira.
• Unai González Suárez, licenciado en ciencias políticas e xestor cultural do concello de Ribeira, que actúa como secretario con voz e sen voto.
