A asemblea do Bloque Nacionalista Galego de Ribeira reuniuse este xoves día 1 de xuño para analizar os resultados electorais deste pasado domingo 28 de maio e explorar vías de acordo.
A militancia do BNG valorou “positivamente” o “amplo respaldo acadado nestes comicios”. O responsábel local, Xabier Vidal, agradeceu o apoio da veciñanza “por situarnos como segunda forza no municipio e principal alternativa ao goberno actual”.
Un tempo novo
Trala análise dos resultados, acordouse, por unanimidade, “iniciar unha rolda de contactos cos distintos grupos políticos para propiciar un cambio de goberno co que abrir un tempo novo”.
A respecto do devandito o portavoz e candidato á alcaldía, Luís Pérez Barral, declarou que “os resultados das votacións demostran que existe unha maioría opta polo cambio en Ribeira”. Nese sentido, declarou, “no BNG asumimos ese mandato popular con xenerosidade, humildade e lealdade para tratar de chegar a un entendemento frutífero cos grupos”.
E explicou: “Imos tender a man aos grupos para falar do que nos une, antepoñendo os intereses da veciñanza ribeirense por riba de todo. Traballaremos arreo, xunto con todo o equipo e cos distintos grupos que decidan abrir ese tempo novo de cambio en positivo e de esperanza que Ribeira precisa”.
