Fran Calo, candidato á alcaldía de Outes polo Partido Popular, trasladouse esta semana a San Caetano para manter unha xuntanza co conselleiro do Medio rural, José González Vázquez, co obxectivo de abordar cuestións interese para o Concello con vistas aos próximos catro anos e no caso de acadar os populares a alcaldía.
A principal proposta que Fran Calo lle trasladou ao conselleiro foi “a ordenación e posta en valor dos montes”. O candidato salientou que a proposta foi valorada “moi positivamente” polo conselleiro, que mostrou o total apoio da Xunta de Galicia a esa iniciativa, ofrecéndolle varias fórmulas para acadar ese obxectivo, como os polígonos forestais, as parcelarias, as agrupacións de xestión conxunta e a figura das SOFOR.
Conselleiro e candidato quedaron xa emprazados a unha próxima reunión despois do 28 de maio se se acadara a alcaldía de Outes, coa finalidade de “definir as zonas e fórmulas concretas para empezar a traballar”.
Na xuntanza tamén se tratou a posibilidade de actuar en zonas que o precisan, para incidir en accesos a parcelas e núcleos rurais.
