O Executivo central confirmou que os traballadores e traballadoras do sector do marisqueo na ría de Noia recibirán este mes de maio e o próximo mes de xuño os abonos correspondentes ás prestacións por cese de actividade nos meses precedentes.
O Goberno informou destes pagos na súa resposta a unha iniciativa do deputado Antón Gómez-Reino, do Grupo Confederal Unidas Podemos-En Comú Podem-Galicia En Común, quen levou ao Congreso a situación insostible do sector, afectado por un episodio de toxina na ría de Noia e unhas condición climáticas anómalas.
Dita iniciativa foi resultado da xuntanza que mantivo a Marea de Noia coas mariscadoras da ría.
Na súa resposta, o Goberno tamén explica que a razón do adiamento na tramitación dos pagos “é a complexidade da mesma” e “a necesidade de comprobar e xustificar cada un dos requisitos esixidos legalmente para a súa concesión”. A maiores, tamén sinala que o Instituto Social da Mariña (ISM) “sempre tivo como obxectivo facer máis sinxelos, máis fáciles e menos complicados” os procedementos, facilitando as ferramentas adecuadas ao cidadán” e expón unha serie de medidas que se están a aplicar para a simplificación e a axilización dos trámites administrativos relacionados cos ceses de actividade.
