As obras de renovación da cuberta do pavillón polideportivo de Sirves, na parroquia ribeirense de Olveira, acaban de concluír. Os operarios da empresa Marqués de Marancán, S.L. foron os encargados da realización desta intervención, cuxo investimento ascendeu a 42.342 euros, IVE incluído, estando cofinanciada pola Vicepresidencia e Consellería de Presidencia, Administracións Públicas e Xustiza da Xunta de Galicia, ao abeiro da orde do 18 de decembro de 2018 pola que se establecen as bases reguladoras e se convocan subvencións para a creación e/ou mellora de infraestruturas, dotacións, instalación e equipamentos vinculados á prestación de servizos municipais, destinadas aos concellos de Galicia para o ano 2019.
Conforme ao proxecto técnico elaborado polos servizos do Concello, o pavillón tiña en liñas xerais un bo estado de conservación pero rexistraba episódicos problemas de filtracións de auga de chuvia que deixaban en ocasións a pista impracticable. Por tal motivo, o Concello procedeu a renovar a cuberta desmontando a anterior, previa instalación dos elementos de seguridade, para montar a nova a base de panel sandwich nervado, de 30 milímetros de espesor, formado por dúas chapas de aceiro prelacado con illamento entre ambas de espuma de poliuretano ríxido. Logo procedeuse ao remate da cuberta para a colocación de canalón na fachada principal, así como a apertura de ocos na fachada norte e colocación de fiestras.
