A portavoz de pesca do BNG, Rosana Pérez instou á Xunta a iniciar, de maneira urxente, accións de mellora, mantemento e limpeza no porto da Pobra do Caramiñal para frear “o grave abandono e deterioro” das instalacións.
Na defensa da proposición non de lei, Rosana Pérez referiuse á necesidade de construír novos vestiarios para o persoal de descarga, medida, dixo, anunciada xa por Portos de Galiza. Nesta liña, propuxo que mentres non se execute obra “ sexan acondicionados os actuais vestiarios atendendo á normativa de seguridade, salubridade e hixiene vixente”.
Por outra banda, tamén aludiu a aqueles espazos que na actualidade son ocupados para actividades alleas ás portuarias como os aparcadoiros.
O porto, explicou, precisa de tomas de auga e luz, facilitar a concesión a “un prezo razoable” do único local de cafetería e dotalo de norais adecuados ao tamaño e envergadura dos buques para o seu atraque.
Ademais, a nacionalista explicou que Portos de Galiza obtivo , entre o 2019 e o 2021, unha media de 30 millóns de euros de ingresos anuais, unha cantidade, na súa opinión, “máis que suficiente” actualizar as memorias e informes anuais de súa xestión na páxina web, porque a última é do ano 2021. Nos informes de xestión do ano 2020 e 2021, os obxectivos que se presentan para o ano seguinte “son exactamente os mesmos, sen variación ningunha, o que cando menos fai dubidar da credibilidade deses obxectivos que se marcan e, evidentemente, do seu cumprimento”.
Sobre as “accións en seguridade portuaria, defensas, sinalización, pavimentos, control de accesos a zonas de máxima actividade, balizamento e obras de atracada”, ou a “licitación dun contrato de mantemento e pequeno investimento nas instalacións do conxunto do sistema portuario”, continúan “inamovíbeis ano tras ano” e a realidade diaria constata que “os portos galegos manteñen graves
deficiencias sen que Portos de Galiza corrixa estas eivas”.
Neste sentido, recalcou que o Porto da Pobra do Caramiñal adoce de falta de tomas de luz e auga obrigando aos camións frigoríficos a permanecer acendidos até completar a carga, hai arquetas sen tapa de rexistro, escaleiras metálicas de acceso aos barcos deterioradas, pavimento estragado, falta de organización nas zonas de aparcamento que se sitúan dentro da zona de traballo, peche da única instalación de cafetería que existía para os traballadores e traballadoras e persoal do porto por pago de taxas excesivas, e “lixo, moito lixo” acumulado a ambas partes da escollera, en terra e, sobre todo, no mar.
O porto da Pobra do Caramiñal, un dos máis importantes de descarga de túnidos de Europa, non pode continuar nesta situación e Portos de Galiza ten unha grande responsabilidade, “Portos de Galiza ten que abandonar o seu labor recadatorio ”e poñer en marcha medidas como o “proxecto de novos vestiarios” para o persoal de carga e descarga.
A deputada do BNG, lamentou que unha vez máis, o Partido popular votara en contra das demandas recollidas na proposta nacionalista e que persista en manter as deficiencias nas instalacións portuarias do Porto do Caramiñal, a pesar da grande actividade que desprega e o movemento económico que xera.
