A gran festa cultural do mes de maio terá un dos seus puntos culminantes este sábado 13 de maio, cando a Asociación de Música e Baile Tradicional Vai de Roda, coa colaboración do Concello, organice o festival Vai de Bares. O evento comezará ás 19h30 cunha ruta polos bares do pobo, onde se poderá gozar da música tradicional en directo. A cita culminará cunha foliada aberta na praza de Rafael Dieste, onde os músicos locais e visitantes uniranse para celebrar a cultura e a tradición musical da nosa terra. Será unha tarde-noite chea de alegría e boa música, na que os amantes da música tradicional terán a oportunidade de gozar dun ambiente único e relaxado. Podemos obter máis información no Facebook da asociación.
Vai de Roda volve á palestra o sábado 20 de maio, no Auditorio de Rianxo, co festival infantil TR3S PRA 3 de música e baile tradicional galegos, organizado (tamén) en colaboración co Concello. Será ás 6 da tarde, na sala Arcos Moldes do Auditorio de Rianxo. Contarase coa participación dos amigos de Cantigas e Agarimos de Santiago de Compostela e O Fiadeiro de Vigo, que compartirán escenario cos artistas locais. O obxectivo do festival é “promover a música e a danza tradicional entre os nenos e as familias, estimulando o coñecemento e a valorización da cultura popular galega”.
