O Concello de Boiro informou da execución de obras para reparar e dotar de beirarrúas un treito da AC-305 ao seu paso polo lugar de Ponte Goiáns. As actuacións están financiadas pola Deputación da Coruña mediante o Plan Único Concellos (POS+2022).
Segundo informan fontes do Consistorio, as obras que se están a levar a cabo contemplan dúas actuacións a realizar en ambas beiras da estrada. Por unha banda vaise dar continuidade á beirarrúa existente no lado sur da vía, un tramo de 172 metros no lugar de Ponte Goiáns. Pola outra, con estas actuacións contemplase tamén a restauración dun treito de beirarrúa que da servizo peonil na AC-305 ao seu paso polo municipio de Boiro. En concreto, vaise mellorar un tramo de 1,06 km que transcorre no lugar de Ponte Goiáns e “que se atopa en estado de deterioro”, explicou o Concello.
Para as novas beirarrúas adoptarase unha solución de pavimento de formigón continuo semi-rugoso que conta “cunha maior durabilidade” e que “vai solucionar os actuais problemas de circulación dos viandantes”, engadiron fontes do Goberno local.
