O Concello de Ribeira repartirá no último curso de Infantil e primeiro de Primaria de tódolos centros educativos do municipio un libro no que os personaxes de Os Bolechas percorren as nove parroquias de Ribeira. Unha acción enmarcada dentro da programación do Día Internacional da Eliminación da Violencia contra a Muller, o 25 de novembro. Así o deron a coñecer esta mañá a concelleira de Servizos Sociais e Igualdade, Ana Ruiz, e a directora do Centro de Información á Muller (CIM), Dolores Crujeiras, a entidade impulsora da iniciativa, para a cal recibiu unha achega da Xunta de Galicia a través de Vicepresidencia e Consellería de Presidencia, Administracións Públicas e Xustiza no marco do Pacto de Estado Contra a Violencia de Xénero.
Así, editáronse un total de 1.500 exemplares desta publicación titulada Os Bolechas van a Ribeira. A igualdade entre nenos e nenas, onde se ilustran enclaves tan significativos coma o dolmen de Axeitos, o porto de Palmeira, o miradoiro de Pedra da Ra ou, por suposto, as propias instalacións do CIM. Deste xeito, a medida que os personaxes van percorrendo o territorio ribeirense transmiten mensaxes que van a prol da igualdade e a liberdade sexual e contra o maltrato e a violencia.
Neste senso, a edil Ana Ruiz manifestou que se trata dunha forma de “inculcar aos rapaces uns valores e que todo debería ser en contra da violencia de xénero e de calquera violencia en si, ademais de promover a igualdade.”
Pola súa parte, Dolores Crujeiras explicou que o contido do libro é profundo, pero resulta doado captar a súa mensaxe, especialmente para aqueles cativos que se inician na lectura. Desta maneira, a publicación aborda “cousas moi básicas, pero que consideramos que son moi importantes”, ademais de que “en poucas palabras, estanse dicindo moitísimas cousas.” Así mesmo, expuxo que é unha forma de non só chegar aos máis pequenos, senón tamén ás súas familias unha vez leven o conto ás súas casas.
