Un total de 27 nenos e nenas de 5º e 6º de primaria dos CEP de Carreira e CEIP de Artes viaxaron este mércores ata a localidade portuguesa de Vila Real para tomar parte nun intercambio escolar promovido polo Eixo Atlántico do Noroeste Peninsular.
Os rapaces viaxaron acompañados do seu profesorado e da técnica municipal de Normalización Linguística do Concello, Alicia Padín, non só para vivir unha enriquecedora experiencia que favorece a autonomía das persoas novas, senón tamén para encher de contido a recoñecida como Lei Andrade, que ten como obxectivo a promoción do uso do galego e do portugués entre a nosa poboación.
Segundo confirmou Alicia Padín, o intenso programa de actividades está a ser de gran proveito para os estudantes das dúas cidades, que estreitaron uns lazos de amizade que se verán fortalecidos en maio coa visita de volta de Vila Real a Ribeira.
A comitiva de Ribeira foi recibida no Salón Nobre da Cámara Municipal de Vila Real polo vicepresidente da Cámara e concelleiro de Educación e Ensino, Alexandre Favaios; e polo director do Agrupamento de Escolas Diogo Cao, Armando Felix.
A continuación fixeron unha andiana polo centro da cidade ata o citado Agrupamento de Escolas, onde levaron a cambio actividades en común como unha aula de robótica, comedor, etc… A xornada concluíu cunha camiñada polos Pasadizos do Corgo e unha cea na Residencia de Estudantes.
O programa deste xoves 20 inclúe a visita ao Palacio de Mateus, un xantar no Agrupamento de Escolas Diogo Cão e outra visita ao Centro de Ciencia/Axencia da Ecoloxía no Parque Corgo antes de emprender o regreso a Ribeira.
