Os socialistas de Ribeira, a través do concelleiro José Manuel Suárez-Puerta Sirgado, presentou ao pleno da Corporación unha pregunta relativa ás construcións de subministro telefónico situadas na praza do Rueiro, en Palmeiro, e máis ao carón do Faro de Corrubedo. Segundo lembra o PSOE, no mes de xullo de 2022 aprobouse en pleno, por unanimidade, “iniciar os trámites necesarios para suprimir a construción situada na praza do Rueiro de Palmeira”. Tamén, sempre e cando isto non fora legalmente posible, acordouse “realizar as xestións necesarias para reducir en todo o posible as súas dimensións e impacto visual”. Asemade, aprobouse erradicar a torre de telefonía emprazada preto do faro de Corrubedo e, tamén, “elaborar un plan de actuación a medio prazo, no que se contemplasen as estruturas do tipo das dúas descritas que, en base ao seu negativo impacto na harmonía e calidade de vida, e na viabilidade das posibles solucións, aconsellen actuar na humanización do Concello”.
Porén, os socialistas critican que malia atoparnos xa no segundo trimestre do ano seguinte, cun ano
practicamente transcorrido e co verán ás portas, “comprobamos que, como desgraciadamente vén sendo costume, do acordo adoptado en pleno, o equipo de Goberno fixo caso omiso do acordado”.
Por todo iso, o Grupo Municipal do PSdeG-PSOE de Ribeira solicita ao Concello que conteste ás seguintes preguntas:
-“Cando ten pensado o equipo de Goberno facer fronte á súa obriga de cumprir os acordos adoptados no pleno municipal no que respecta a estes e outros casos que sendo aprobados en pleno sen levarse finalmente a cabo?”
-“Cando pensa, cando menos, informar aos compoñentes do pleno das xestións e negociacións realizadas, en caso de ter realizado algunha, e dos resultados obtidos?”
