Este sábado, día 15 de abril, a empresa Golfiño Xestión de Ocio vai presentar en Ribeira (no Centro Cultural Lustres Rivas) o Curso Oficial de Monitorado en Actividades de Tempo Libre que vai desenvolver no concello. A cita será entre as 9 e as 14 horas.
O curso está incluído dentro dun proxecto elaborado por Golfiño Xestión de Ocio e que consta dunha axuda convocada na área de influencia socioeconómica do Parque Nacional Marítimo-Terrestre das Illas Atlánticas de Galicia con cargo ao Plan de recuperación, transformación e resiliencia (PRTR), financiado pola Unión Europea-NextGenerationEU, para os anos 2022 e 2023. Golfiño foi adxudicataria desta axuda para o proxecto Coñecendo o Parque Nacional das Illas Atlánticas de Galicia, ambiciosa iniciativa multidisciplinar de educación ambiental que, a través do xogo, divulga os valores e a importancia que ten o Parque Nacional das Illas Atlánticas na conservación ambiental da nosa flora e fauna.
Vista aérea da illa de Sálvora, en Ribeira, pertencente ao Parque Nacional das Illas Atlánticas
As actividades están destinadas a favorecer o respecto e coñecemento da natureza, a igualdade de xénero, a inclusión, o deporte, a formación e a dinamización do noso entorno. As accións previstas poñen o foco na mocidade, nas familias e nos nenos e nenas.
As actividades que imos desenvolver dentro deste proxecto son:
• Viaxar a Sálvora e a Ons para, a través de rutas guiadas por guías titulados do Parque Nacional, coñecer de preto os valores medioambientais do parque.
• Facer un campamento infantil de verán, que verse sobre o Parque Nacional das Illas Atlánticas.
• Formación específica para a poboación local, facendo un curso de monitoraxe oficial de tempo libre con especial incidencia no traballo no Parque Nacional.
• Elaboración dun menú con produtos do mar Km 0, para dar a coñecer a gastronomía local.
• Visitas guiadas pola zona de influencia do Parque Nacional, como pode ser o entorno de Couso cos illotes de Sagres.
A primeira das actividades xa convocada, e que dá inicio este sábado día 15 de abril, é o devandito Curso Oficial de Monitorado en Actividades de Ocio e Tempo Libre. No transcurso desta acción formativa traballarsae en temas medioambientais e especialmente no ámbito do Parque Nacional. Farase unha visita guiada á Illa de Sálvora e as persoas guías acreditadas realizarán unha interpretación do patrimonio natural. Amais, desenvolveranse varios xogos adaptados á nenez.
“Con este curso”, explican dende Golfiño, “crearemos unha bolsa de emprego, para que as mozas e mozos que se formen con nós poidan traballar ao longo de todo o ano e así podamos desestacionalizar o turismo sustentábel e potenciar a figura do monitor/a-educador/a”.
O resto das actividades programadas levaranse a cabo durante a época estival, para “deste xeito ter unha maior incidencia no poboación local e nas persoas que teñan a ben visitarnos”, engaden dende Golfiño.
