O Elma da Pobra do Caramiñal será escenario o mércores 4, ás 12.00 horas, da presentación da VI Edición do Calendario Solidario de AMBAR. Unha iniciativa que promove a asociación desde o 2015, celebrando o cine con valores sociais.
O acto tomará a forma dunha pequena gala onde as persoas asistentes poderán ver en primicia tódolos carteis incluídos no calendario. Así mesmo, presentarase un vídeo de todo o proceso de traballo, desde a caracterización previa á realización das propias fotos. Finalmente, procederase á entrega duns galardóns simbólicos a tódalas persoas participantes.
O evento tamén contarán coa presencia de colaboradores coma Pichero Estudio Fotográfico, Academia Yara, representantes do Concello pobrense e pola directiva de AMBAR.
Coa participación de case 60 persoas, o calendario deste ano destaca porque tódolos filmes pertencen ao cine español. Dentro da variedade existente de calendarios solidarios no panorama nacional, o de AMBAR é o único que a través dun traballo minucioso de caracterización, vestiario e deseño, representa carteis de películas.
O calendario nos formatos de parede e sobremesa poñerase á venta o 5 de decembro, podendo reservarse a través do enderezo electrónico correo@asociacionambar.org ou do teléfono de contacto 981874480. Os fondos recadados irán destinados a financiar proxectos para promocionar o empoderamento e inclusión das persoas con diversidade funcional.
Esta actividade enmárcase nas propostas realizadas por AMBAR para o 3 de decembro, Día Internacional das Persoas con Diversidade Funcional, e cuxa finalidade é fomentar o empoderamento das persoas con diversidade funcional e amosar unha visión positiva da mesma a través da expresión artística.
