A Xunta de Galicia anunciou en Boiro a concesión de 1,2 millóns de euros á asociación da nosa comarca Amicos para ampliar a capacidade da súa residencia nun 70%, coa creación de 25 novas prazas. O anuncio foi dado pola conselleira de Política Social e Xuventude, Fabiola García, que visitou este luns 27 de marzo a sede de Amicos en Boiro, que na actualidade conta con 37 prazas e que coa ampliación acadará as 62, asentándose deste xeito como un servizo de referencia para as familia do Barbanza, da ría de Arousa e doutras poboacións próximas.
Esta achega económica outorgada a Amicos enmárcase na orde de axudas posta en marcha polo Executivo autonómico para a construción ou remodelación de centros de titularidade social, que está dotada de 13 millóns de euros.
Esta convocatoria de axudas permitirá que dez entidades sociais de Galicia, como é o caso de Amicos, melloren os seus servizos ou creen outros novos, segundo fixo saber a conselleira, salientando o apoio da Xunta ao tecido asociativo que traballa no ámbito da atención á discapacidade, con axudas directas a través da orde do IRPF que este ano conta con 19 millóns de euros; con máis prazas públicas financiadas nos seus centros; cunha achega específica de 3,4 millóns de euros para a actualización dos salarios do seu persoal ou coa nova liña de subvencións para a compra de vehículos adaptados, da que tamén se beneficia Amicos con 65.000 euros para a adquisición de dúas unidades.
