Dende o Concello de Ribeira informan do comezo das obras dirixidas á ampliación do parque infantil de Arrochela, en Palmeira, situado moi preto do paseo Plácido Betanzos, fronte á zona portuaria.
Este recinto de xogos é un dos máis empregados na localidade, polo que se detectou a necesidade de proceder á súa ampliación para satisfacer a demanda actual. Indo á obra en cuestión, prevese a demolición da xardineira que o circunda e parte do pavimento de lastras (adoquín) da praza onde se sitúa, gañando así un espazo que permitirá instalar novos xogos que complementen aos existentes.
Asemade, estenderase unha capa de caucho continuo nas áreas de seguridade e céspede artificial na superficie restante. Engadir que esta actuación está sendo executada pola empresa Construcciones
Anspal, S.L., e supón un investimento de 39.798,05 euros. As obras terán unha duración de dous meses.
