O Concello de Boiro vén de recibir un Desfibrilador Externo Semiautomático (DESA) para o servizo de Protección Civil e Emerxencias. O concelleiro, Marcos Fajardo, acompañou na mañá deste 21 de marzo ao coordinador do servizo, Nacho Pérez, e outros membros da agrupación á recepción e xornada formativa do dispositivo que tivo lugar na Academia Galega de Seguridade Pública.
O Servizo de Protección Civil e Emerxencias do Concello de Boiro presta servizo durante 24 horas e os 365 días do ano para a atención ás emerxencias derivadas do Centro Integrado de Atención ás Emerxencias 112, da Garda Civil a Policía Local ou particulares; colaboran en accidentes, incendios urbanos ou forestais, asistencia ou auxilio a persoas ou colaboración en actividades e probas deportivas do concello ou en colaboración con outros concellos.
A agrupación conta na actualidade con 36 voluntarios activos que colaboran nos distintos operativos. “O servizo de Protección Civil e Emerxencias fai un labor fundamental en atención a emerxencias, polo que é necesario seguir aumentando e mellorando o material do que dispoñen para prestar un mellor servizo”, afirmou o concelleiro.
O Concello de Boiro recibe o material mediante unha subvención de vicepresidencia segunda da Xunta de Galicia, no marco das subvencións que teñen como finalidade adxudicar equipos de emerxencias e que están co-financiados polo Fondo Europeo de Desarrollo Regional, no marco do programa operativo FEDER-Galicia.
