O Concello de Boiro adiantou este mércores 15 algúns detalles da axenda de actividades desta Semana Santa no termo municipal. A información sobre o programa, organizado pola Irmandade do Cristo da Misericordia en colaboración coa Administración local, foi dada a coñecer pola concelleira de Cultura, María Outeiral, a irmá maior da entidade relixiosa boirense, María José Figueroa, e o párroco de Boiro, Julio Cárdenas.
Os actos comezan o vindeiro sábado 25 de marzo, Sábado de Lázaro, co pregón e prolónganse ata o Domingo de Pascua, o 9 de abril. “Retomamos a costume do pregón, que terá cea de confraternidade, e haberá actividades durante todos os festexos”, afirmou a irmá maior, María José Figueroa.
O párroco de Santa Eulalia de Boiro, Julio Cárdenas, agradeceu o traballo que hai detrás da organización dos actos “que recuperan todos os detalles de antes da pandemia para recuperar as costumes da parroquia”.
A concelleira de Cultura, María Outeiral, reiterou o apoio do Concello á directiva no seu traballo en organizar os actos da Semana Santa “un momento que supón unha dinamización do noso municipio, tanto para o turismo como o comercio”.
