A Universidade de Santiago e o Concello de Outes achegan este ano unha nova entrega do ciclo formativo universitario para persoas maiores Camiños de Coñecemento e Experiencia. O programa inclúe media ducia de actividades formativas e para anotarse nelas as persoas interesadas deberán chamar ao Centro Social de Outes (981 850 575).
A axenda comeza o 20 de marzo cun seminario sobre os dereitos básicos das persoas consumidoras e prosegue ao día seguinte cunha actividade formativa sobre os servizos no fogar: luz, gas, telefonía e Internet.
O 22 de marzo proseguirán as accións previstas cun seminario sobre moda, arte e historia, e ao día seguinte as persoas participantes teñen unha cita cos tesouros artísticos e patrimoniais que posúe un grandes monumentos da nosa comarca: Santa María a Nova de Noia (inclúese visita). O venres 24 celebrarase un achegamento aos trastornos do sono. A axenda rematará cunha sesión práctica sobre técnicas para durmir mellor e, en consecuencia, mellorar a nosa calidade de vida.
