Con motivo da celebración do Día de Rosalía no que se conmemora a data de nacemento da autora, 23 de febreiro, o alumnado de Ribeira do primeiro ciclo de Primaria dos colexios locais participará nunha Festa de Aniversario no Auditorio Municipal ás 11.30 h coa actuación de Charo Pita e a familia Papaventos. No transcurso da celebración, os cantares acompañarán as palabras de Charo sobre Rosalía. Para rematar a festa recitaranse uns versos da nosa poeta de maneira conxunta e cataránselle os parabéns. Os neniños e neniñas levarán un pequeno recordo agasallo da Fundación Rosalía de Castro.
Pola tarde, ás 20.00 h, na praza do Concello, celebrarase a tradicional lectura pública dos versos de Rosalía, con micrófono aberto para toda a cidadanía.
