A directora xeral de Xuventude, Participación e Voluntariado, Cristina Pichel, estivo na mañá deste 15 de febreiro co alumnado e o profesorado do IES Campo de San Alberto de Noia que participa no programa Correspondentes Xuvenís. Pichel, que puido coñecer de primeira man o proxecto que están a desenvolver ao abeiro do programa, agradeceu a implicación do profesorado nesta iniciativa e destacou tanto o labor informativo como de dinamización do día a día no centro educativo que realizan estes estudantes.
Os 13 correspondentes deste instituto noiés cursan Formación Profesional Básica de Electricidade e electrónica e o ciclo medio de Xestión administrativa, e a proposta que están a levar a cabo denomínase ACADIX (siglas de Actividade, Convivencia, Aprendizaxe, Diversidade, Igualdade e Xénero). Entre as accións que realizan están a actualización do taboleiro de información do centro, a creación do grupo lector Libros con Café, obradoiros de intelixencia emocional ou a preparación do entroido.
A directora xeral de Xuventude explicou que finalidade de Correspondentes Xuvenís é “facer partícipe ás mozas e mozos na difusión de axudas, programas ou actividades que son do seu interese”. Ao abeiro do programa alumnado de Secundaria, Bachalerato, Formación Profesional e universitario “actúa como altofalante, achegando toda esta información aos seus compañeiros e amigos”, dixo.
En Noia, ademais do IES Campo de San Alberte, tamén está adherido ao programa Correspondentes Xuvenís o IES Virxe do Mar, coa participación de 10 estudantes. Este curso 2022-2023 hai máis de 650 correspondentes por toda Galicia.
