O Concello de Boiro informou do comezo das obras do proxecto de urbanización e ordenación de cruce en Triñáns. O alcalde, José Ramón Romero, e o concelleiro de Urbanismo e Obras, Luís Ruiz, visitaron o lugar para coñecer as obras que se van levar a cabo.
Segundo fixeron saber, o estado actual do cruce precisa dunha adecuada organización do tráfico e do espazo peonil da zona, para o que se van levar a cabo tarefas de pavimentación e disposición de alumeado, sinalización e dotación de mobiliario urbano. “Trátase dun núcleo moi transitado polo que transcorren moitos vehículos e que se vai acondicionar para mellorar a súa seguridade”, afirmou o alcalde.
As actuacións contemplan o movemento de terras para o seu acondicionamento; a execución dun muro de cachotería; a pavimentación con aglomerado asfáltico, soleira de formigón e faixa de granito; a sinalización viaria; nova iluminación tipo LED e mobiliario urbano
As actuacións ascenden a un importe de 48.367,41 euros, financiados mediante fondos propios do remanente de tesourería do ano 2021.
