O Certame de Carrozas do Entroido Rianxeiro xa quece motores e o Concello achegou estes días unhas poucas novidades sobre a nova edición do mesmo. Segundo fixo saber, este ano engadirase ao programa tradicional un concurso de disfraces en grupo. Ademais, repartiranse 4.000 euros en premios e gratificacións.
Dende o Consistorio tamén fan saber que neste punto de inflexión entre xaneiro e febreiro comunicaranse máis detalles sobre o Certame de Carrozas. Tamén lanzan un chamamento á cidadanía e ás asociacións a participar nos concursos, que, como vén sendo tradición, celebraranse o domingo de Entroido. No certame poderán sumarse grupos que deberán acudir á praza Castelao cunha carroza e levando a cabo unha escenificación. A partir de aí, comezará o desfile polas rúas do centro urbano de Rianxo.
O xurado valorará novamente cuestións como a orixinalidade e a creatividade de cada proposta, así como o traballo que teñen detrás para a súa materialización. Tamén se atenderá á escenificación das carrozas e aos disfraces das persoas que participen nelas.
