Os catro domingos seguintes deste mes de xaneiro e de febreiro, os días 22 e 29 de xaneiro e 5 e 12 de febreiro, vaise celebrar no local multiusos do Mercado Municipal de Boiro un obradoiro de iniciación ao baile tradicional en familia. As sesións desenvolveranse ás 12.00 horas e virán da man das persoas que integran a asociación local Xilbarbeira (referente comarcal e galego na reivindicación da nosa cultura e folclore tradicionais), no marco do programa de actividades Miscelánea en Movemento, impulsado dende o Concello de Boiro. Trátase dunha actividade destinada a maiores de 3 anos. O dito programa tamén vén esta tempada con obradoiros de ximnasia hipopresiva, de iniciación ao swing e, tamén de equilibrio e movemento.
