A actividade cultural da Pobra do Caramiñal continúa esta fin de semana coa representación da segunda das funcións do ciclo de teatro afeccionado impulsado pola Concellaría da Cultura, da cal é titular a edil Patricia Lojo (PSdeG-PSOE), coa colaboración da Rede Cultural da Deputación da Coruña. Teatro Airiños (con sede en Asados, Rianxo) subirá ás táboas do Elma no 22 de xaneiro, ás 19.00 horas, para representar a función República sideral.
Trátase dun texto da rianxeira Esther Carrodeguas que foi distinguido en 2020 co XIV Premio Barriga Verde para escritos de teatro de monicreques na modalidade para persoas adultas. Recrea a clásica farsa da cachaporra a través de personaxes de carne e óso que parodian un intento independentista da Illa de Arousa, sempre en clave humorística.
A entrada é libre ata completa-la cabida da instalación municipal.
