O Concello de Noia iniciou esta semana os traballos destinados a mellorar a rúa Coruña, traballos que teñen por finalidade optimizar as condicións de seguridade na vía. A actuación, dotada dun orzamento de 84.527 euros, consistirá na renovación do firme, na reorganización de carrís e das prazas de estacionamento e nunha nova localización para os pasos de peóns, así como no pintado e instalación da sinalización horizontal.
Fontes do Consistorio indicaron que con estes labores búscase “dotar a unha das rúas máis transitadas do casco urbano dunhas mellores condicións de seguridade tanto para o tráfico rodado como para viandantes”. Tamén fixeron saber que “por mor destes traballos, o estacionamento estará prohibido nesta rúa ata o remate dos mesmos, nun período estimado de dúas semanas”.
Esta actuación súmase a outras que se van a levar a cabo nos vindeiros días e outras xa realizadas recentemente, que “supoñen unha mellora substancial das características de distintas vías de acceso a Noia e do seu núcleo urbano”, engadiu o Concello.
O alcalde de Noia, Santiago Freire, sinalou que “a través desta actuación búscase dar continuidade ao plan de mellora de estradas municipais actuando nunha rúa vertebradora do tráfico entre a estrada comarcal Noia-Santiago e a estrada Noia-Muros que empregan un elevado volume de usuarios e autobuses” e incidiu no compromiso do Goberno local en “promover as maiores condicións de seguridade”.
