FIXA A NOVA TEMPADA DE PESCA DA ANGUÍA NA DESEMBOCADURA DO RÍO TAMBRE ENTRE O 1 DE MAIO E O 30 DE SETEMBRO DE 2023
A Xunta anunciou este 10 de xaneiro que a tempada da pesca da anguía na desembocadura do río Tambre estenderase desde o 1 de maio ata o 30 de setembro deste ano. Así se recolle na resolución publicada no Diario Oficial de Galicia e pola que se aproba a renovación do plan de aproveitamento específico da especie para 2023, “mantendo os principais requisitos que rexeron nesta zona durante a tempada anterior”, explícase na resolución, especificándose que o tamaño mínimo das capturas será de 20 centímetros, “coa obriga por parte dos pescadores de devolver ao río os exemplares que non dean a talla, así como as anguías prateadas e outras especies que entren nas nasas”. O total de capturas para a tempada será de 1000 kg, e unha vez alcanzada esta cantidade darase por pechada a campaña.
Ademais, estipúlase que para poder practicar a pesca da anguía na desembocadura do Tambre a única arte permitida será a nasa-voitirón, cun tamaño de malla non inferior a 14 milímetros e un límite de 10 artes por tripulante. Por outra banda, as nasas deberán ser levantadas e revisadas diariamente e o horario autorizado para a actividade estenderase desde as 12,00 horas do luns ata as 12,00 horas do sábado, cun máximo de 8 horas diarias de traballo.
A Xunta lembra que no caso do Tambre, o plan de aproveitamento da especie para 2022 autoriza a faenar no tramo comprendido entre a liña que une Punta Testal con Punta Requeixo e Ponte Nafonso, exceptuando a zona de desembocadura do río Tines.
A partir do 1 de maio, o plan de aproveitamento da anguía autoriza a faenar á Confraría de Pescadores San Bartolomé de Noia, que conta con dúas embarcacións autorizadas para exercer a actividade: Benigna, cun máximo de dous tripulantes, e Baña, que poderá levar ata tres. A comercialización das capturas levarase a cabo na lonxa de Noia, estando obrigados os participantes no plan a entregar a totalidade dos exemplares.
