A conselleira de Infraestruturas e Mobilidade, Ethel Vázquez, destacou hoxe o investimento de 2,7 M€ na mellora do firme da estrada AC-550 entre Noia, Porto do Son e Ribeira, que está executada ao 90%.
Vázquez Mourelle supervisou hoxe estas actuacións que a Xunta está a acometer nesta estrada, nun treito de 38 km de lonxitude, a meirande parte no concello de Porto do Son, que concentra 25 km da intervención.
Os traballos iniciáronse en setembro, cun prazo de 6 meses, polo que xa se están a ultimar para ofrecer a veciños e usuarios desprazamentos máis cómodos e seguros. Segundo avanzou a conselleira, se as condicións meteorolóxicas o permiten, as obras rematarán nunhas semanas.
Ethel Vázquez puxo en valor a importancia desta intervención de mellora do firme para a seguridade e a comodidade dos condutores. A ese respecto, apuntou que esta é unha estrada moi transitada, cunha intensidade media de tráfico de entre 5.000 e 9.000 vehículos/día, máis aínda no verán, e que o firme presentaba deterioracións que facían necesaria eta actuación para garantir a circulación nas condicións axeitadas.
A conselleira detallou que a Xunta realizou primeiro unha completa avaliación da situación da estrada, avanzando a continuación, e sen demora, nos trámites administrativos necesarios para poder levar a cabo a súa rehabilitación.
Ademais destes traballos de mellora do firme, tamén se aproveita para levar a cabo outras dúas intervencións que redundarán no reforzo da seguridade viaria.
Así, por unha parte, no miradoiro de Fonforrón preveuse a habilitación dun cambio de sentido que require ensanchar a estrada; e, por outra parte, tamén en Porto do Son, uns quilómetros despois, un carril central de espera para garantir xiros máis seguros cara á esquerda.
A intervención complétase con traballos de drenaxe, limpeza de cunetas, sinalización e defensas.
Vázquez Mourelle salientou o esforzo da Xunta pola mellora da rede viaria autonómica na contorna, con actuacións como como as rotondas de Portosín e de Xuño xa executadas, ou agora coa rehabilitación da Ponte Ceilán, que está en execución, e o proxecto da variante de Ribeira que proximamente comezará a materializarse.
A conselleira lembrou que cada euro non investido a tempo na conservación dunha estrada implica a necesidade de, a medio prazo, ter que investir o dobre para manter a calidade das vías.
Precisou que todo gasto na mellora do firme e na conservación á larga tradúcese en aforro para as administracións e para o conxunto dos cidadáns, ademais de previr problemas.
Subliñou que a Xunta destina nos Orzamentos de 2023 case 50 M€ á conservación e mellora das estradas autonómicas, mantendo o Plan de reforzo de firmes que, con máis de 17 M€ permitirá seguir mellorando as vías para mantelas en condicións de seguridade.
