Este xoves realizouse a presentación do Plan de Sustentabilidade Turística “Barbanza Arousa”, proxecto da Mancomunidade beneficiario de 1,5 millóns de euros de Fondos Next Generation.
Interviron Fátima Cachafeiro, xerente da Mancomunidade Barbanza Arousa; D. Cesáreo Pardal, presidente do Clúster de Turismo de Galicia; D. Xosé Lois Piñeiro, presidente da Mancomunidade Barbanza Arousa e alcalde da Pobra do Caramiñal; Dna. Nava Castro, Directora da Axencia de Turismo de Galicia e D. José Miñones, Delegado do Goberno en Galicia.
Este proxecto está protagonizado pola oferta enogastronómica de Barbanza Arousa, sumando dous componentes fundamentais; por un lado, o compoñente “Sistemas Produtivos e Transformadores Enogastronómicos” como son as bateas, as conserveiras e as adegas e, por outro; o compoñente “tempo”.
Con este plan preténdese o desenvolvemento do territorio orientado a través dunha viaxe polos sabores a través da historia do territorio, experimentando tanto o produto fresco coma os diferentes sistemas de conservación dos alimentos, dende a salazón ata a conserva; maridado polos viños da IXP Terras do Barbanza e Iria.
Diferentes roteiros tematizados, os museos da salazón e a conserva; a visita inmersiva con realidade aumentada ao Barrio dos Cataláns na Pobra do Caramiñal e as visitas a conserveiras e adegas permitirán adentrarse e poñer en valor a historia produtiva do destino, conxugando pasado e presente.
Asemade adecuaranse espazos para showcookings e eventos gastronómicos no Liceo Marítimo e Rianxo e crearase un clube de produto no que se integrarán as empresas turísticas e tamén adegas e conserveiras e aqueles oficios relacionados coa pesca e captura de especies.
Todos estes produtos creados conectaranse a través de roteiros enogastronómicos dotados de vehículos eléctricos, que permitirán ao visitante vivir unha experiencia completa en todo o territorio a pé, en bicicleta, en vehículo eléctrico ou por mar. Estes roteiros ademáis estarán complementados con sinalización intelixente para lograr unha experiencia totalmente inmersiva.
