O grupo municipal do PBBI presenta ao pleno de Ribeira unha moción sobre as consecuencias das accións dos edís que coarten a liberdade dun compañeiro da corporación.
Segundo expón a formación, producíronse uns feitos que cualifican de “lamentables e reprochables” facendo referencia a que algúns membros da corporación municipal “demostraron un absoluto descoñecemento do que é e significa o debate democrático, así como a crítica política.” Engade que se acabaron sacando á rúa asuntos relacionados con temas abordados en sesión plenaria provocando, tal e como manifesta, situacións que “poden ser consideradas como faltas de respecto e, incluso, con tintes intimidatorios.”
Así mesmo, o PBBI indica que o Concello ribeirense debería articular as medidas oportunas para que, “en caso de que haxa algún concelleiro que non respecte os principios básicos dun código ético polo que debemos rexernos principalmente como persoas”, constitúa o respecto aos demais un principio básico polo que se goberne, “e que ningún dos membros desta corporación municipal vexa coartada a súa liberdade por parte doutros edís tanto dentro coma fóra do salón nobre do consistorio.” O partido liderado por Vicente Mariño de Bricio precisa que o obxectivo que impere será que “a confrontación dialéctica que poida haber entre concelleiros quede no salón de sesións como parte do referido democrático.”
Por todo isto, o PBBI insta ao pleno a solicitar ao Concello de Ribeira que calquera acción dun edil que “coarte a liberdade dun compañeiro da corporación municipal, independentemente do partido político de que se trate e que incluso se poida ver ou sentir incómodo”, supoña a dimisión inmediata do concelleiro causante desa situación.
