Papá Noel, antes dos días de máxima actividade de reparto de agasallos, visitará A Pobra do Caramiñal para coñecer as crianzas do CEP Salustiano Rey Eiras, do CEP Pilar Maestú Sierra, da E.E.I. Fernández Varela, do Monte Carmelo e das unitarias do Vilariño, A Granxa e A Angustia. Preto de 500 escolares dos referidos centros educativos da Infantil e da Primaria achegaranse ata o Teatro Cine Elma do día 19 ao 21 de decembro, en distintas quendas, para lle trasladaren en persoa todo aquilo que plasmaron nas súas cartas.
Haberá tamén sesión de contacontos e sacarase unha foto conxunta por grupo que se lles entregará como obsequio aos centros para o recordo.
Esta actividade enmárcase na programación deseñada para estas datas dende a Concellaría da Promoción Económica, da cal é titular a edil Charo Varela (Nós Pobra).
